AI科技漸漸融入日常生活，而最新一步就將會改變大家常用嘅「Google 搜尋」。據Google於美國時間星期三宣佈，Google搜尋將會顯示更多「AI概覽」，同時佢哋亦宣佈推出全新嘅「AI Mode」，令用家可以直接提出問題，再由AI即時搜尋網上資料回答。

去年5月時Google率先於美國推出以自家AI「Gemini」為骨幹嘅「AI概覽」（AI Overview）功能。簡單黎講就即係用家搜尋時，會於傳統嘅搜尋結果之上多出一個由Gemini整理而成嘅概覽，免卻用家自己撳入各個連結了解資訊嘅麻煩。去年8月Google將此功能推廣至美國以外國家，到昨日嘅公告中就話目前已有10億人用緊呢個功能。

而最新嘅進展，就係Google會將去年12月推出嘅「Gemini 2.0」應用於「AI概覽」之上，令其能處理如程式編碼、高級數學等較難嘅問題。未來用家搜尋呢類資訊時，會更容易獲得「AI概覽」，畀出黎嘅答案亦會更加準確、高質。不過上述功能目前只係美國本土可以用。

Google官方AI概覽介紹

而另一個更大嘅動作，就係Google宣佈推出新嘅「AI Mode」。據外媒報導，所謂AI Mode會同依家嘅「圖片」、「新聞」、「地圖」一樣，成為Google Search頁面上方嘅選項之一，用家進入之後就會見到一個類似Chatbot嘅頁面，並可以直接提出問題，AI就會幫你搜尋相關資訊、整理，再生成一個對話式答案——再簡單啲講，就即係同Perplexity又或ChatGPT Search基本一樣，只係背後用上Google搜尋嘅資源以及Gemini咁解。

目前此功能只限 Google One AI Premium訂閱者先可以試用，未知幾時會正式推出。

資料來源：Google