大家有冇幻想過2050年嘅人類會用咩交通工具？電力車？飛行車？甚至瞬間傳送？近日日本川崎重工就提出一個新諗法——2050年嘅人，會騎機械四腳獸移動！

卻說川崎重工上週於大阪關西世博會上發表一隻用氫動力驅動、有四隻腳嘅機械獸「Corleo」概念產品。據川崎重工指，Corleo係用「2050年嘅移動方法」為主題而設計，整體大小同一部大型電單車差唔多，實際上某啲技術亦係來自依家嘅電單車。例如Corleo嘅前後腳都擁有搖臂避震，減輕顛簸感；同時四足可以獨立移動，令Corleo可以於任何類型嘅地面上行動自如。

動力來源則係一部150cc嘅氫氣動力發電機，利用氫氣生成電力後再推動Corleo活動。而駕駛者就需要騎喺Corleo上面，透過移動身體重心以操控Corleo嘅前進方向。

雖然川崎重工指出「Corleo」預計會2050年推出，但大家都應該估到Corleo只係一個概念，事實上發佈會上川崎重工亦冇公佈速度、續航力等技術規格。但話雖如此，能夠幻想一下未來人類會騎住隻機械獸出街，好似又幾好玩喎！

資料來源：川崎重工