如無意外，萬眾矚目嘅任天堂新一代Switch 2今日就於全世界開放預售，不過於近日有如過山車一樣嘅國際局勢影響之下，就連Switch 2都少不了受影響，有市場機構仲因而下修Switch 2嘅銷售數字添！

圖片：任天堂

據日本《Bloomberg》日前報導，美國市場調查機構DFC Intelligence於近日嘅最新報告中，將Switch 2嘅預計全球銷售量由原本嘅1,700萬部，略為向下調整為1,500萬部。而報告中指出影響預估數字嘅最大原因，就係因為美國近來推出嘅關稅政策，仲講到明「如果因為關稅而令Switch 2售價上升的話，好多人可能會暫緩購買。」

事實上自美國關稅政策出台之後，任天堂就宣佈延後美國及加拿大地區嘅Switch 2預購，到撰文之時仍無確實日期，但同時亦講明原定6月5日嘅正式發售日唔會改變。另一邊廂，《日本經濟新聞》報導指任天堂決定無限期延後Switch 2於中國地區嘅發售時間表，打算再觀察下中國市場對Switch 2嘅反應及購買意欲先決定。同時報導亦指任天堂考慮到中國地區對主機及遊戲嘅嚴密審查會增加風險。

圖片：任天堂

雖然暫時失去北美及中國兩大市場或會影響Switch 2嘅銷售數字，但整體黎講其實仍然樂觀。《Bloomberg》報導就依然預計Switch 2會成為史上銷售速度最快嘅遊戲主機。

資料來源：Bloomberg、日本經濟新聞