萬眾期待嘅《GTA 6》早前宣佈延期至明年5月先推出，對於玩家們黎講要等多一年固然失望，但據外媒報導，《GTA 6》調整發售日期後整個遊戲界可謂亂成一片——因為不論大小廠商都為咗避其鋒芒而決定緊急調整自家遊戲嘅發售日。

據《Bloomberg》報導，由於《GTA 6》無論幾時推出、最後好唔好玩，只要一旦推出都一定會吸引到絕對大部份媒體、玩家們嘅注意力。所以為免自家遊戲成為《GTA 6》嘅炮灰，所以各大遊戲廠商都唔願意於同期推出遊戲。例如報導就指《GTA 6》宣佈延期至明年5月後，一個正在開發緊大型多人連線遊戲嘅廠商就決定將遊戲推出日由明年秋天，延遲到2026年春天。背後原因除咗遊戲的確需要更多時間開發之外，亦係想儘量遠離《GTA 6》嘅發售日。

此外，著名遊戲製作人小島秀夫早前亦指，《GTA 6》對多款遊戲嘅發售日有實質影響。換言之「避開《GTA 6》」可能係目前遊戲界嘅共識之一。

更令其他廠商頭痛嘅係，Rockstar遊戲發售日一再推遲已經係家常便飯之事，目前亦冇人——相信連Rockstar都唔敢——保證《GTA 6》真係會於明年5月正式推出。換言之其他遊戲廠商目前正陷入進退兩難，改又唔係唔改又唔係嘅困境。能夠推測嘅係，於《GTA 6》真係推出之前，整個遊戲界都會處於坐立不安嘅情況；而對玩家最壞嘅情況，就係太多遊戲為《GTA 6》讓路，造成「無Game可玩」嘅地步——某程度上亦反映出《GTA 6》影響力之巨大。

資料來源：Bloomberg