近年歐洲多個國家以及美國多個州份都以保護未成年接觸成人內容之由，推出更嚴謹嘅年齡驗證法案，亦導致著名成人網站Pornhub先後退出多個市場。而近日著名嘅電腦遊戲模組（Mods）網站Nexus Mods亦宣佈會更新服務條款，未來使用者必須通過年齡驗證先可以瀏覽網站上嘅NSFW內容。

所謂嘅遊戲模組（Mods）其實係PC遊戲玩家可以額外加入遊戲之中嘅附加程式，其功能由改動遊戲內嘅傷害經驗等數值、到改變遊戲角色嘅服裝身材等外觀，甚至利用市售遊戲作為基石直接整一隻新Game出黎都得，變化相當多樣，亦係唔少PC玩家難以轉投主機嘅原因之一。

而Nexus Mods作為著名嘅Mods發佈以及下載網站，近日就宣佈因應英國及歐州嘅相關新法規而更改服務條款，未來用家除咗要有帳號之外，亦必須向Nexus Mods提交（目前未知係咩嘅）個人資料以驗證年齡，否則將無法查看網站上嘅NSFW內容，例如每個遊戲都必然出現嘅性感外觀模組。

圖片：Nexus Mod

根據英國嘅網絡安全法案（Online Safety Act）以及歐洲嘅電子服務法案（Digital Service Act），企業有法律上有義務移除其網站上的非法內容，並採取阻止兒童存取成人內容嘅保障措施。Nexus Mods於公告中則表示成人內容係網站上嘅重要元素之一，所以唔認為移相關內容係可行方法，換言之唯一方法就係加入年齡認證。同時佢哋亦強調推出新改動係維持合法經營之下嘅唯一選擇，「如果我哋唔跟的話就會被人罰錢罰到執笠」、「係，你可以為目前網絡世界嘅發展方向，以及世界各地政府越黎越大嘅監管力度感到憂心或者憤怒，但法律就係法律，Nexus Mods會、亦必須跟從。」

資料來源：Nexus Mods