SONY嘅全片幅隨身機RX1R系列睽違10年終於迎來新作！RX1R III延續系列一貫輕巧便攜設計、配備ZEISS Sonnar T* 35mm F2定焦鏡頭，同時喺像素、對焦性能同影像處理上全面升級，帶來前所未有嘅拍攝體驗。

SONY RX1R III搭載全片幅6,100 萬像素Exmor R™感光元件（A7R V同款），配合最新BIONZ XR™影像處理器，唔單止提供超高解像度，仲保證低光環境下嘅出色表現同極低噪點。除此之外，更加入AI處理單元，支援更準備嘅主體識別功能，無論係影人、動物、鳥類、昆蟲，定係汽車、火車、飛機，都能夠精準鎖定同連續追蹤。而對焦系統亦升級到693個相位偵測對焦點，覆蓋範圍更廣，捕捉動態主體更加得心應手。

至於機身設計方面，RX1R III採用鎂合金材質外殼，輕巧又堅固耐用，連同電池及記憶卡重量僅為498g。今次電子觀景窗（EVF）則改為後置式，有別於前兩代嘅彈出式設計。而後置螢幕則升級為3吋236萬像素觸控式螢幕，不過就冇得翻轉，意味進行低角度拍攝時，用家可能踎低去就返部機。

為了彌補鏡頭只有35mm焦距嘅局限性，RX1R III加入了「分段裁剪拍攝功能」功能，令用家能透過感光元件裁切在35mm（6,000萬像素）、50mm（2,900萬像素）及70mm（1,500萬像素）等效焦距之間切換。而且相機仲配備微距模式，透過鏡頭環操作可以對近至20cm嘅主體進行對焦。

Sony RX1R III定價為5,100美元，比2015年推出嘅RX1R II貴咗成1800美元，預計今個月在美國率先發售，香港方面暫時未有消息。