隨住越黎越多研究指出長期使用社交媒體會影響青少年心智發展，同時互聯網上又一直充斥住被視為對年輕人有害嘅成人內容，唔少家長都開始重視小朋友使用智能手機嘅頻率。而近日有美國公司就推出一款專為青少年而設，唔可以下載社交媒體App、甚至連個網頁瀏覽器都冇嘅特別版iPhone，以協助家長管理小朋友嘅習慣。但有試用過嘅年輕人就擔心用咗呢部電話之後會無哂朋友，高昂嘅月費亦令人質疑電話只為有錢家庭而設，無法幫助最有需要嘅低收入家庭。

圖片：Sage Mobile

據《Guardian》報導，美國公司Techless近日於英國推出一款「網絡安全手機」Sage Mobile，透過於一部普通iPhone 16上安裝特別軟件，從而限制電話嘅部份功能。據報Sage Mobile中嘅網頁瀏覽器以及搜尋服務被移除，亦無法使用Apple App Store下載任何社交媒體或遊戲，用家只能從另一個特設嘅商店下載交通相關（如Uber及Google地圖）、網上銀行、學校相關以及天氣等應用程式。

Techless創辦人Chris Kaspar指出，目前市售嘅智能電話嘅初始設定對於應用程式及網絡使用無任何限制，係相當「黑暗」，仲將其比喻為一部「無安全帶嘅汽車」。佢指出希望初始設定係「安全及健康」的。而Sage Mobile嘅宣傳物料亦指出電話並非只係「限制電話使用時間」，仲係「於真實生活重新連結」。

Techless指Sage Mobile於美國推出時，成功令青少年使用手機嘅時間由一日三個鍾降到15分鐘至一個鐘內。而《Guardian》搵黎一個16歲嘅英國青年試用Sage Mobile後，亦表示的確能大幅減少手機使用時間——因為部電話咩都做唔到實在太悶。佢亦表示自己多咗同屋企人相處，甚至做嘢嘅效率都有提升。

圖片：Sage Mobile

但該名青年同時指出，TikTok及Instagram已經係呢個世界嘅運轉方式之一，如果青少年無法使用就等如脫離消息圈子，與朋友缺乏共同話題，甚至感覺被遺棄及疏遠。該名青年亦指出疫情期間佢用電話玩《Roblox》識到非同校嘅幾個朋友，而手機就係佢哋唯一聯絡、知道對方近況嘅方法。所以當手機失去相關功能時，可能會造成青少年嘅人際關係崩塌。另一方面，佢認為如果家長真係堅持要小朋友用部「安全嘅電話」，咁外表睇落同正常電話一樣嘅Sage Mobile至少好過一部Nokia「磚頭」，起碼同朋友出街時唔會被笑。

《Guardian》亦提出Sage Mobile嘅月費過於高昂，未能利及所有家庭。目前Sage Mobile嘅最低月費為一個月99鎊，比起兩年合約嘅iPhone 16貴一倍。而過度使用手機嘅問題，通常都出現於雙親都要出外工作、又冇咩資源擁有其他興趣嘅低收入家庭青少年身上。而每個月一千銀港紙嘅月費，明顯就唔係呢啲家庭能夠負擔。

資料來源：Guardian、Sage Mobile