最近Insta360及DJI兩大公司互相進軍對方領域！繼無人機龍頭DJI早前宣布推出首款全景相機後，以360度全景相機聞名嘅Insta360今日就宣布成立無人機子品牌「Antigravity」，並預告下月將公開首款產品，一款支援8K全景拍攝嘅無人機。

據官方介紹，Antigravity係Insta360與第三方公司共同孕育嘅全新品牌，團隊核心成員嚟自全球頂尖影像及科技公司，旨在「重新定義空中探索及故事敘述」，為用家帶嚟沉浸式自由飛行體驗。其首款全景無人機將支援8K解像度全景拍攝，機身重量小於249g，即使無人機新手亦能夠輕易上手，捕捉每個精彩瞬間，預計今年8月正式登場。另外，機身亦會具備負載檢測等功能﹐防止違規改裝，確保產品唔會被當作軍事用途。

除此之外，Antigravity亦同步公開一段宣傳短片，當中部份片段可能就係由呢款全景無人機拍攝。預計玩法會同Insta360嘅全景相機類似，用家能夠喺後製時自由選擇視角及構圖，提供更大嘅創作空間，更多詳情有待官方下月揭曉！