去年推出嘅遊戲《Palworld》（幻獸帕魯）因為玩法及當中嘅精靈與任天堂旗下《Pokemon》系列非常相似，結果推出時先係引起《Pokemon》玩家抨擊，去年9月時任天堂亦真係對《Palworld》開發商發起侵權專利訴訟。但近日有玩家就發現有隻叫《Palland》嘅新遊戲疑似抄襲《Palworld》，而且遊戲竟然於任天堂官方嘅Nintendo eShop中有售，造成「我抄隻抄你嘅Game就無事」嘅奇怪情況。

《Palland》遊戲介紹及宣傳圖

圖片：ec.nintendo.com

先交代背景。《Palworld》係Pocket Pair於去年1月推出嘅開放世界動作冒險遊戲，其最大特色就係地圖上存在大量精靈，而玩家唔單止可以用槍等武器捕捉精靈作戰鬥伙伴或坐騎，仲可以將佢哋煮黎食甚至放入工廠工作以協助生存。而由於遊戲內嘅精靈與《Pokemon》頗為相似，所以遊戲又被戲稱為「有槍嘅Pokemon」。

而最近於Nintendo eShop上推出、售價僅HK$79嘅《Palland》就由官網上自稱「最瘋狂的遊戲工作室」Boogysoft製作。根據遊戲介紹，其核心玩法係「生存、建造與探索」，玩家將要決定「如何收集資源、擴建庇護所，以及應對那些既具威脅性又可能成為強大能量來源的野生生物」。而介紹圖片中亦可以見到玩家與奇幻生物戰鬥。

《Palworld》遊戲介紹及宣傳圖

圖片：Steam

換言之，除咗畫風唔同咗啲、生物設計又唔同咗啲之外，《Palland》基本上就係《Palworld》嘅複製品，所以就引來抄襲嘅嫌疑。而令事情更有趣嘅，係《Palworld》被任天堂告緊侵權，但疑似侵權《Palworld》嘅《Palland》係於任天堂官方嘅Nintendo eShop上推出，似乎代表任天堂認為「抄隻抄我嘅Game」係無問題嘅。

目前不論任天堂、《Palworld》開發商Pocket Pair及《Palland》開發商Boogysoft都未有針對事情發言。

資料來源：nintendosoup