Samsung原定計劃在明年初推出嘅S26系列，以主打輕薄設計嘅Edge機型，全面取代舊有嘅Plus機型。但由於今年5月推出嘅Galaxy S25 Edge銷情未如理想，Samsung最終決定調整策略，重啟S26 Plus機型開發計劃。

據韓媒《The Elec》引述供應鏈人士消息，Samsung原定計劃為S26系列開發三款機型，分別係S26標準版（或會改名為S26 Pro）、S26 Edge以及S26 Ultra，其中Edge原意係用嚟取代長期銷情低迷嘅Plus機型。不過，由於Galaxy S25 Edge在5月上市後銷量欠佳，Samsung最近已決定追加開發S26 Plus機型。若然消息屬實，意味S26系列將會有4款機型可選。

報導指出，Galaxy S25 Edge自6月起出貨量急劇下跌，而智能手機嘅銷售高峰期一般集中在頭三個月，所以Samsung大概喺8至9月就判斷到Edge無法成為熱賣型號。根據Samsung同零件供應商分享嘅生產數據，S25 Edge在今年9至12月嘅產量僅約30萬部，少過同期嘅S25 Plus（50萬部），並遠遠落後於S25 Ultra（約340萬部）同S25標準版（約290萬部）。

換句話講，Samsung本身想用Edge取代Plus拉動銷情，但結果Edge仲賣得差過Plus。至於背後原因係市場對「薄機」反應冷淡，定純粹係S25 Edge自身吸引力不足，咁可能要等埋同樣主打輕薄設計嘅iPhone 17 Air銷情，先能夠再下定論。