俗話有云：「早買早享受、遲買平幾舊」，但如果大家係打算於新一年換新電腦、新電話的話，呢句說話就未必再準確。據美國Internation Data Corporation（IDC）於最新發佈嘅展望報告，因為面向消費者市場嘅記憶體短缺兼加價，所以2026年嘅PC、智能手機將會變得「貨少又貴」，而且問題似乎唔會於短期內解決。換言之遲買反而會貴幾舊。

圖片：ImageFX

DRAM及NAND記憶體係任何現代電腦必備嘅組件，而因為各家AI鉅頭都不停揼錢大規模增加算力，於是記憶體生產商就開始減產消費級產品，改為生產毛利更高嘅企業級款式。例如Micron早前就宣佈關閉旗下消費級品牌Crucial，以回收其生產線另作他用。此舉導致消費級記憶體嚴重短缺，售價於過去一段時間內暴漲。

而IDC報告就指出，呢個情況屬於非典型嘅行業建構性改變，預計至少會持續好幾年時間。換言之未來幾年內，各大電腦品牌都要面對「貴Ram」甚至「無Ram」用嘅情況，兩者都會限制其出貨量，以及推高電腦售價。報告估計2026年間PC出貨量最多會下降8.9%，售價則上升最多8%；智能手機出貨量則會減5.2%，售價上升最多8%。

圖片：ImageFX

諷刺嘅係，PC市場本來應該進入一個上升期：AI嘅普及理應會掀起一波「AI電腦」換機潮、PS5等遊戲主機越黎越低嘅性價比又令玩家們改買「電競PC」。但偏偏呢兩種電腦本身都需要大量高規格消費級記憶體，係最受目前記憶體短缺問題影響。換言之其缺貨、加價程度亦應該係最嚴重嘅。

報告亦指出Apple、Samsung等大廠因為本身有錢，加上應該係同記憶體供應商簽咗多年合約，所以能於短期內吸引記憶體短缺帶來嘅影響。但對於其他規模較細嘅廠商而言，加價似乎係必然、而且好快會出現嘅事。

資料來源：Engadget