喺今年消費電子展（CES 2026）上，電競品牌Razer發布咗一款名為「Project Ava」 嘅概念產品。佢唔單只係一個語音助理咁簡單，而係一個有形象、可互動嘅全息投影桌面夥伴，主打全天候陪伴用家處理工作、日常生活同遊戲娛樂。

以往提到AI助理，我哋通常都係對住空氣講嘢，或者透過文字輸入發送指令。而Razer今次就利用全息投影技術，將AI助理「實體化」，變成一個約5.5吋高、可以放喺枱頭嘅虛擬角色╴仲可以根據用家嘅對話內容同情緒反應，作出唔同嘅表情同動作，令互動體驗更似真人。目前官方總共提供5款虛擬形象供用家選擇，包括動漫風女角「KIRA」、粗獷猛男「ZANE」、《英雄聯盟》六冠王「FAKER」、去年喺X爆紅嘅日本OL「SAO」以及Razer Logo「AVA」。

硬件方面，Project Ava內建鏡頭、麥克風同喇叭，並由xAI嘅大型語言模型Grok驅動，能夠感知周圍環境，仲可以透過USB連接電腦，讀取同分析螢幕畫面內容。功能覆蓋生活、工作同遊戲多個層面，例如提供穿搭建議、推薦餐廳、協助分析文件同整理數據；打機時亦可以即時提供戰術建議、裝備配搭、角色背景等資訊，玩家唔使再打打下機拎手機出嚟查攻略。

不過，外媒《The Verge》記者實測後就指出，Project Ava目前似乎仍存在唔少技術問題。記者喺會場試玩《戰地風雲 6》時向Ava提問，發現系統經常出現「問非所答」嘅情況，例如記者問Ava而家用緊咩武器時，Ava無法識別具體型號，只知記者用緊一把有瞄準鏡嘅突擊步槍，而且仲會不停用大量無關痛癢嘅說話填補對話空白。

更有趣嘅係，測試期間Ava突然對記者表示：「哎呀！又俾人擊倒啦！振作啲！你係無敵㗎！」雖然看似情緒價值滿分，但實情記者只係喺射擊場訓練模式練習，根本冇被人擊倒過。當然，Razer亦強調Project Ava仍然處於開發階段，出現錯誤都算情有可原嘅。

Razer表示，Project Ava有望在2026年下半年正式推出，暫時未公布正式售價，但已經喺官網開放美國地區玩家預訂，有興趣嘅用家可支付20美元作為訂金率先預訂。