Apple正式發布全新入門機型iPhone 17e！今次規格同性價比都比上代16e更有誠意，喺定價不變嘅情況下，換上同iPhone 17同級嘅A19晶片，基本容量更直接翻倍由256GB起跳，同時將上代缺乏嘅MagSafe磁吸充電補齊，不過螢幕就依舊係「M字額」設計，未有升級成動態島。

喺而家呢個乜硬件都加價嘅年代，Apple決定加量不加價！新機起步價維持HK$5,099，但入門容量就由以往嘅128GB直接Double升級到256GB（另有512GB版本選擇）。與此同時，Apple亦終於聽取民意，將上代被狠批閹割咗嘅磁吸充電功能加返入去，全面支援MagSafe及 Qi2 15W無線快充，用家終於可以完美用返磁吸式行動電源、卡片套或者車用支架等實用配件。

效能方面，iPhone 17e搭載咗iPhone 17同級嘅A19晶片，雖然GPU核心微調至4核心（標準版為5核），但整體運算速度已足以順暢應付最新iOS系統同3A級遊戲。另外，17e仲換上咗Apple最新設計嘅C1X數據機系統，官方表示連線速度比上代16e嘅C1最快可達2倍，兼且能源效益更好。

至於外觀同相機配置，iPhone 17e維持6.1吋Super Retina XDR螢幕（60hz）。雖然保留咗經典嘅瀏海設計，但螢幕表面就升級咗做同旗艦機睇齊嘅「陶瓷晶體護面 2（Ceramic Shield 2）」，大大提升抗刮能力同減少反光。機背就繼續採用單鏡頭設計，配備4,800萬像素主鏡頭，支援2倍光學品質變焦。

iPhone 17e將於3月4日開始接受預訂，並於3月11日正式開賣，共有淺粉紅、白及黑三款配色選擇。256GB版本售價為HK$5,099，而512GB版本則為HK$6,799。