七年真係癢？婚後出軌機率

文：MenClub 魏文青　　
POSTED ON 11 Nov 2018

如果黎到2018年你都仲相信愛情必定永遠熱烈如火，咁一係你好好彩，一係你好傻豬。大家都知兩個人一齊耐咗，熱情會慢慢被消磨，好彩嘅就變成感情，唔好彩就開始大家就開始「痕」，而結婚七年就係坊間公認最易有「痕動」嘅時間。原來呢個時間點又真係有啲根據架。

根據Dr.Lehmiller引用嘅嘅一個近期研究，訪問過313名平均年齡32-33歲、結咗婚至少一年嘅以色列異性戀成年人，再將佢哋按結婚年期(小於5年，6-10年及11年或以上)分析後發現，整體而言，隨住結婚年期增加，男女雙方出軌嘅機會率亦會隨之增加，但若果以性別分開計，男女出軌率嘅走勢就略有不同。男士嘅出軌率的確隨住結婚年期呈線性上升，亦即年期越長越易出軌；而女性則在中期(6-10年)最易出軌，短期或長期機率都較低。「七年之癢」似乎又真係有根據。

另一個於90年代在美國進行嘅研究則發現男女出軌率隨結婚年期上升，去到啱啱好七年就係高峰，之後男女走勢就出現不同。女性出軌率一過七年就慢慢下跌，去到結咗婚20年或以上嘅女姓出軌率已經幾乎跌到零；而男性結婚七年後嘅出軌率雖然下跌，但結婚18年左右又再開始上升，結婚30年或以上嘅出軌率甚至比起「七年之癢」時更高。
順帶一提，「七年之癢」呢個詞係出自1955年由瑪麗蓮夢露主演嘅電影《The Seven Year Itch》，當中被風吹起白裙嘅一幕成為其標誌。

縱然數據有可能受世代文化影響(年長女性更傾向隱瞞出軌)，但似乎「七年」真係一段婚姻嘅難關。但大家又要注意，以上兩個研究只係講緊出軌機會，而唔係話結婚七年就一定會(或者一定要)出軌！而出軌嘅原因亦唔一定係結婚年期長短，更多嘅係反映夫妻之間出現問題。都係嗰句，任何關係都要經營同溝通嘅！