唔少教人追女仔嘅文章、甚或你嘅朋友都會話，第一次同女仔出街，男仔記得要畀哂錢，但實際上呢樣嘢又係咪真係咁重？如果冇畀哂錢又係咪會即刻被個女仔淘汰出局？有日本網站訪問咗超過900名年齡介乎10代到60代嘅女性，發現唔同年齡嘅女性對於「男仔有冇比哂錢」呢家嘢，有好唔同嘅睇法。

首先，整體黎講，有大約1/4 (25.8%) 受訪女性認同，如果第一次出街男仔冇比哂錢，就會將佢排除出戀愛對象嘅行列，呢個比例可能已經比唔少人想像中低。但更有趣嘅係，年紀越輕嘅日本女性，對於初次約會男仔有冇比哂錢呢回事就更唔著緊：10代女性中只有14%人認為男仔一定要畀哂錢、20代為22.1%、30代為21.2%，最在意呢件事嘅，反而係基本上已經退出戀愛市場嘅「50代 (36.7%)」及「60代 (31.5%)」

分析指，目前處於50代及60代嘅日本女性，年輕開始約會時正正就係日本泡沫經濟嘅黃金時期，錢易搵嘅情況下，男士們自然較為闊綽，令呢個年齡層嘅女性習慣由男性畀錢；但40代或以後嘅女性，就係泡沫經濟爆破後先開始約會甚至出生，同時亦係日本女性開始出外工作嘅時期，當知道啲錢有幾難搵、而自己亦有一份收入時，就更願意負擔約會嘅部份費用，對於係咪男仔畀哂就自然冇咁在意，造成「越年輕越唔會因為男仔冇畀哂錢而不滿」嘅情況。