《New York Times》早前刊登著名記者紀思道 (Nicholas Kristof) 嘅文章，指責Pornhub使用包含未成年人士、非自願性行為等色情內容謀利，Pornhub隨即成為多方口誅筆伐嘅對象。而Pornhub嘅「回應」，就係推出一系列新政策，包括限制上傳以及禁止下載。

之所以要用引號，係因為Pornhub自己話呢啲新政策唔係因為紀思道篇文而推出，而係源自4月時舉行、針對網站上「非法內容」嘅獨立調查 (Pornhub都有獨立調查，問你死未) 而作出嘅改善。新政策之下，Pornhub只會容許合作伙伴 (即成人影片製作商)、以及已認證嘅「Model」上傳影片，換言之一般民眾就唔可以上傳影片至Pornhub；另外亦即時移除網站嘅下載功能 (付費內容除外)。兩樣嘢加埋就係令Pornhub唔會成為非法內容嘅散佈源頭。

同時Pornhub亦會成立「Red Team」以「主動審視已被上傳嘅影片，避免違法及堵塞系統漏洞」。而明年Pornhub亦會發佈首份「透明度報告」，以總結審查嘅結果。

圖片：截圖自New York Times

日前紀思道於《New York Times》發佈題為《The Children of Pornhub》文章，揭露Pornhub對非常內容嘅忽視後，MasterCard、加拿大總理杜魯多、美國參議員Josh Hawley都指會作出相應行動。