英國《The Sun》做咗一個調查，希望能夠搵出英國封城後對大眾性生活嘅影響，當中毫不意外地發現好多人都轉為使用FaceTtime等科技，但同時亦好意外地發現前《Top Gear》、現《The Grand Tour》主持James May成為女性幻想對象嘅第二名！

圖片：The Grand Tour

卻說《The Sun》嘅調查發現，自英國再一次封城、無辦法去「探訪」其他人屋企之後，有近25%受訪者轉用FaceTime或者WhatsApp進行虛擬性愛；同時又有36%受訪者表示自己每日平均睇兩個鐘AV。亦有10%受訪者開始嘗試各種性愛科技，其中24%受訪者表示曾經參與「網上性愛派對」，當中又有41%人每星期參加一次，更有25%人每星期參加兩次。另外有33%人嘗試使用智能性愛玩具，仲有24%人嘗試過睇VR成人影片添。

不過亦有人選擇最簡單直接嘅方法解決性需要——你唔畀我去人哋屋企，我就唔係屋企做！所以有25%人曾經於室外進行性愛活動，其中最熱門嘅地點係屋企個花園、另外郊區、公園、海灘及停車場都係熱門地點。

同時又因為大家冇街去，留喺屋企睇多咗電視，所以有近17%受訪英國民眾曾經對電視明星們有性幻想。其中以英國真人騷《Love Island》入面嘅明星為幻想對象嘅有25%、以Netflix大熱劇集《Bridgerton》明星們為幻想對象嘅有15%，更有10%係以政治人物為幻想對象——喺香港就真係好難想像到。

圖片：Netflix

但要數到成個調查最令人驚訝嘅，就係James May成為女性們迷戀對象第二名，僅輸比棟篤笑演員Greg Davies，贏咗英國衛生大臣夏國賢 (Matt Hancock)。至於男性迷戀對象第一名就係著名主持人、今年60歲嘅Carol Vorderman、第二名係Beyonce、第三名係主持人Holly Wiloughby。