因為某「蕾神」嘅爆料，大家呢幾日應該聽唔少「自戀人格」、「性成癮」等嘅字眼。無獨有偶，四位來自美國及加拿大嘅心理學者近日就發表咗一個新研究，指「自戀人格」及「性成癮」原來係與「性欺騙 (Sexual Deception)」有正面關係，或者就解釋到點解某位王生咁鐘意講大話啦。

首先，所謂「性欺騙」係建立於「性合意 (Sexual Censent)」之上，如果一個人透過欺騙、誤導等方法，例如年齡報細數、扮有錢、明明有但扮冇性病等等，而令對方同意進行性行為，呢種就叫做「性欺騙」。四位學者指，佢哋因為見到越黎越多「Stealthing (即做愛時未經對方許可偷偷拎走個安全套)」行為，又見未有太多相關研究，所以開始今次調查。

於是佢哋搵黎約1,770名年齡介乎16-81，男女比例為34%:63% (仲有3%報稱非二元性別)嘅受訪者，並要求佢哋回答一份關於性欺騙行為嘅網上問卷。結果發現不論男女其實都有性欺騙行為，而且比例都幾接近。例如調查發現有34%男性與33%女性都會「對過往有幾多個性伴侶報細數」；12%男及9%女會謊稱自己「做咗STI (性傳染病) 測試而且冇事」。

不過男女之間對於「講咩大話」方面就有所不同。研究指男性更傾向就財富、職業、外貌等方面而講大話，而且亦更傾向年齡報細數；反之女性就傾向年齡報大數。

另外，調查亦發現「自戀人格」與「性成癮」與「性欺騙行為」有正面關係，研究指「自戀人格」因為極度自我中心而且缺乏同理心，所以更容易透過「性欺騙」去脅逼對方進行性行為；而性成癮者就因為急於做愛，所以為求達到目的不擇手段。

資料來源：Blatant sexual deception: Content, individual differences, and implications