唔知點解，好多人都覺得當一個人去到某個年紀，就唔可以貪玩，要成熟穩重，要認真嚴肅，「嘩你打機玩Figure呀？成個小朋友啲女仔唔鍾意架」。但根據一個最新嘅研究，貪玩 (Playfulness)嘅人，不論男女，原來都會有更多段浪漫關係，似乎貪玩係一種吸引人嘅條件黎。

首先要注意，呢到講嘅「貪玩 (Playfulness)」，唔係講緊「玩女人」嗰種「玩」，而係真係講緊輕鬆、有趣、打打鬧鬧嘅人生態度及行為。而巴西聖保羅大學心理學系研究員Yago Luksevicius de Moraes嘅團隊，就搵黎近1,200名巴西成年人，先紀錄佢哋嘅短期 (包括一夜情) 及長期關係嘅次數，再要求佢哋回答另一份問卷，將佢哋分成四種不同類型嘅「Playful」：他者主導性 (Othe-Directed) 係指享受與其他人一齊玩，以及用玩黎令社交更有趣；輕鬆遊玩 (Lighthearted) 係指將人生視作遊戲，不太重視將來；智慧型 (Intellectual) 指重視不同想法以及解難；而異想天開 (Whimsical) 就指對日常生活中各種奇怪事感興趣。再統計不同Playful類型人嘅短期、長期關係次數，睇下兩者之間有冇關聯。

結果就發現，如果男性係傾向於「他者主導型」，不論年齡都會傾向有更多短期及長期關係對象。研究指「他者主導型」嘅男士會令人感覺較少侵略性、更合作，所以更容易吸引長期及短期伴侶。另一邊廂，傾向「異想天開型」嘅女性，就會有更多短期關係伴侶。研究估計可能係「異想天開型」女性會更願意開展短期關係，並希望將其變成長期關係，又或者係佢哋會不停換短期伴侶，直到搵到一個適合成為長期伴侶嘅為止。

資料來源：Adult playful individuals have more long- and short-term relationships