於IG上有16萬Followers嘅英國歌手Brocarde近日就宣佈與男友籌備緊婚禮，但就遇上唔少問題，包括場地啦、賓客啦、日子啦咁。對於任何能夠搵到真愛、與之共諧連理嘅人，大家理應送上祝福，但絕大部可能只會對呢場婚禮送上疑問，因為呀新郎哥、Brocarde嘅現任男友，真係一個「鬼」佬黎。

在 Instagram 查看這則貼文

Brocarde（@brocarde）分享的貼文

現年38歲嘅Brocarde由去年開始，就聲稱一位 (隻) 名為Edawardo 嘅維多利亞時代士兵 (鬼魂) 出現喺佢位於牛津郡嘅屋企，然後佢哋兩個就成為情侶，去年11月Edwardo更成功向佢求婚，之後兩個人開始籌備婚禮，但就遇上各式各樣嘅問題。

首先就係婚禮日子，Brocarde指自己希望於夏天舉行，但Edwardo就唔鍾意太熱，Brocarde更指自己其實幾鍾意見到Edwardo「熱到溶」(原文中睇唔出係咪比喻黎)。反正兩口子就因為日子問題而爭執——值得一提嘅係佢哋嘅爭執方法亦相當新穎，據Brocarde指，Edwardo會透過佢沖涼時嘅水流黎傳達訊息，亦會向其身體傳遞冷或熱感表達心情——最後Brocarde打算用塊靈乩板 (Ouija Board，即係外國版碟仙) 黎決定婚禮日期。

在 Instagram 查看這則貼文

Brocarde（@brocarde）分享的貼文

另外場地方面，Brocarde就希望於教堂行禮，問題係佢哋問過英國多間教堂，都唔接受佢哋呢段陰陽之戀，甚至有牧師認為Brocarde根本就係撞鬼，威脅要為佢進行驅魔。Brocarde指Edwardo有試過同佢一齊去教堂睇場地，但就感到非常不舒服，「對佢黎講太危險啦！」

另外賓客方面亦令一對新人非常頭痛。Brocarde話佢希望邀請雙方親友一同蒞臨，問題係Edwardo嘅親友都已經全部死哂，要邀請佢哋就比較難。更麻煩嘅係，Edwardo極度希望搵佢軍中嘅好兄弟做伴郎，但據 (Brocarde引述) Edwardo指，呢個好兄弟因為於1875年經營鴉片館，目前仲喺地獄坐緊，連聯絡都冇辦法更唔好講黎做伴郎。

另一邊廂，本身就係個演藝圈人嘅Brocarde亦希望邀請不同名人出席，目前佢個賓客名單上就有瑪麗蓮夢露、貓王以及大文豪莎士比亞。Brocarde甚至唔介意莎翁喺婚禮上發表新詩作，但就強調佢唔可以試圖重現名劇目《哈姆雷特》，因為成場做哂要四個鐘佢冇咁多時間。

在 Instagram 查看這則貼文

Brocarde（@brocarde）分享的貼文

另外Brocarde就透露去年Edwardo求婚嘅過程。佢話喺某個「一齊過嘅晚上」之後，第二朝起身半睡半醒之時，佢就發現自己塊面責住隻唔知邊到黎嘅戒指，但到真係醒嘅時候隻戒指又唔見咗，然後佢去沖涼，留意到花灑嘅水流形成一個「?」，但佢理性地認為自己只係未瞓醒。到第二日同樣嘅事情又再發生，而且今次戒指冇唔見到，佢就終於明白原來係Edwardo向佢求婚。

Brocarde指Edwardo為佢帶黎好多創作靈感，「強逼我去接受一個全新的世界」。另外佢亦分享情人節會同Edwardo出去慶祝，但就有啲不滿佢要負責出錢。不過佢亦提到Edwardo其實好慳家，主要係因為佢唔使食嘢飲嘢。

資料來源：Metro