自古以來，樣貌都係男女擇偶時重要嘅影響因素，兩個其他條件一樣嘅人，你一定會揀靚啲嗰個，只係大家都為咗避免被人話「睇樣咁膚淺」所以避以不談咁解。而近日一個美國研究就指，「睇樣」呢個擇偶行為其實一啲都唔膚淺，反而仲非常「深入」，因為你覺得一個人個樣貌吸唔吸引，原來係同佢嘅免疫系統有關。

來自德州基督教大學嘅研究員Summer Mengelkoch指，過往雖然已經有研究證實，人會視某啲樣貌特徵為「健康」或「長壽」，繼而將呢啲樣貌特徵視為「靚」，再影響人類嘅擇偶行為，但就未有研究直接將「樣貌吸引度」與「免疫系統」掛勾。所以佢就搵咗159個冇肥胖問題、冇慢性病、冇心理病、冇接受緊賀爾蒙療程嘅大學生，先紀錄佢哋嘅身高、體重，再抽血檢驗，以評定佢嘅免疫系統強弱。然後再搵另外492名大學生，為嗰159名大學生嘅樣貌進行評分。

結果就發現，免疫系統與樣貌評分之間的確係有關連性，特別係免疫系統中對抗細菌嘅能力，與樣貌評分嘅關連性更強。換言之，你以為自己睇緊對方個樣靚唔靚，實際上係睇緊佢免疫系統好唔好。而且由於研究係直接將免疫系統，而非實際健康狀態 (免疫系統勁都可以病，唔勁都可以唔病) 與樣貌吸引度作連結，表示人類唔係覺得「健康嘅人係靚」，而係「更能抵抗細菌嘅人係靚」。

但值得留意嘅係，部份關連對於男女黎講係相反嘅。例如男性體內嘅「NK細胞 (natural killer cell)」數量與樣貌吸引度係成正比 (越多NK細胞樣貌評分越高)，但於女性身上就係成反比 (越少NK細胞樣貌評分越高)。另外是次研究只集中於「樣貌」，換言之身材等其他能夠與健康、免疫系列強弱明顯有關嘅身體特徵並不在此研究範圍內；另外研究亦無法解釋「樣貌吸引度」與「免疫系統」之間嘅實際關係 (例如個樣嘅邊部份對應免疫系統邊部份)

資料來源：More than just a pretty face? The relationship between immune function and perceived facial attractiveness