卻說近日多個台灣傳媒都不約而同地報導一個2020年嘅美國研究，話只要每週做愛一次或以上，死亡率就會大減近半，就算每個星期做唔到一次，但只要一年入面有做過愛 (即一年做1-51次愛)，死亡率都會下降三份一。呢啲對大家下半身同下半生一樣咁重要嘅嘢，我當然要同大家好好研究一下啦。

近日台灣傳媒引用嘅，其實係當地健康傳媒《潮健康》於2020年嘅一篇報導，而《潮健康》篇報導就係引用來美國華盛頓大學醫院，應該係華裔研究員「Chao Cao (音譯大概係曹超) 」及其研究團隊於2020年發表嘅一個研究。研究利用美國健康營養調查由2005至2015年嘅數據，搵出15,269名美國成年人 (平均年齡為39.1歲) 一年平均做愛次數，再結合紀錄中佢哋嘅存亡以及死因而成。

首先，研究發現如果按2014-2015年嘅數據，於20-59歲嘅美國成年人中，有71.7%人每年做愛次數係12次或以上，亦即每個月平均做到一次或以上，但當中只有36.1% (即總數嘅四份一左右) 一年做到52次、即平均一星期一次或以上。

而數據中紀錄有228名受訪者已經離世，當中29人係因為心血管相關原因離世、62人係因為癌症離世。

結果「做愛次數」與「離世原因」，研究就得出「做愛次數與死亡率呈反向關係」，即係做愛次數多，死亡率就會變低。實際上嘅數字，就係「每年做多過52次愛嘅人」嘅「全因死亡率 (包括因病、意外、年老等原因)」，係「每年最多只做一次愛」嘅人嘅51%，即係死亡率降咗一半左右；而降得最多嘅其實係癌症死亡率，「做夠數」嘅人嘅風險降咗近7成。

研究結論就話，性生活似乎能夠作為美國中年人嘅健康指標之一，有效顯示其全因死亡率及癌症死亡率。

資料來源：Trends in Sexual Activity and Associations With All-Cause and Cause-Specific Mortality Among US Adults