早前香港有地產公司搵個女經紀著住浴巾拍片介紹樓盤引起爭議，似乎大家都覺得地產經紀應該有個專業形象。不過如果我話你知，日本有間地產公司嘅賣點，就係全部經紀都係女仔，令你睇樓之餘仲有份約會嘅感覺，唔知你又會唔會想試下？

日本呢間叫「girls賃貸」嘅地產公司，主要服務關東地區嘅樓盤，佢嘅賣點就如同公司名一樣，旗下所有經紀都係女仔，而且佢哋陪你睇樓嘅時候會著上一般私服，令你有種同女朋友約會去睇樓嘅感覺，一改過往地產經紀都係一本正經中年大叔嘅形象。

而佢哋網站上嘅經紀團成員介紹，亦唔係話佢負責過啲咩買賣，而係介紹佢哋嘅興趣、出身，當中有人原本係牙科護士，有人係歌手，有人係YouTuber又有人話鍾意潛水。講真佢哋靚唔靚就見仁見智，但勝在夠哂親切咁囉！

其中幾位地產經紀嘅私人照

而且「girls賃貸」強調，所有經紀都係有牌，而且一樣有關於樓盤嘅專業知識，另外收費方面亦同一般地產公司冇分別。你話如果香港都有人搞類似嘅服務，會唔會加快樓市復甦呢？