自從車Cam出現之後，唔少人都會將「馬路奇事」放上網同大家討論，但一般黎講，大家都係討論「條片拍到啲咩」，而日本日前就出現一條車片，明明「咩都拍唔到」，但就係因為「拍唔到」而引起網民熱烈討論。

卻說日本容許紅燈左轉，只要冇人等緊過馬路，即使係紅燈都可以直接(左線) 轉左，但熱愛改車嘅日本網民「けんごくん @domcchiYo」某晚於某個路口紅燈左轉後，就被當地警察攔下，話佢冇先讓一位等過馬路嘅女性行人。由於佢冇印象見到有人等過馬路，所以佢事後就搵返當時嘅車Cam出黎睇，結果橫睇掂睇，都見唔到有人準備過馬路，片中唯一見到嘅行人係一名距離緊路口仲有一段路嘅疑似男性，而馬路口兩邊唔好講女人，直頭人影都見唔到個。

今さっきのことなんだけど、女性の歩行者がいないのに警察に止められて心霊的に怖かったｗ
ちょ、とりま動画見て。 pic.twitter.com/0w26XG9clJ

— けんごくん (@domcchiYo) November 11, 2022

車Cam後半段有紀錄警察截停佢之後嘅對話，據警察所講，當時嗰位女士當時仲有向警察們招手，所以警察先會留意到佢。而依家車Cam見唔到嗰位女性，咁究竟警察當時見到嘅係咩人……定應該係咩「嘢」黎呢？

另外值得一提嘅係，雖然「けんごくん @domcchiYo」架車係改裝車，但當時嘅警察截停佢之後，只係作出口頭警告，係冇開單罰錢。而「けんごくん @domcchiYo」亦表明佢唔係想公審警察，而係覺得「警察見到啲車Cam見唔到嘅嘢」呢件事好得人驚，所以先放上網同大家分享。