如果一個男仔讚一個女仔「好波」，通常都係指緊女仔身材嘅部份。但今晚要介紹呢位「高倉菫」，佢就係真真正正嘅「好波」，事關佢係日本一名知名籃球網紅，而且唔係久唔久落街場射下波「呃Like」嗰啲，係真係可以同男仔1-on-1打得有來有往嘅好波之人！

現年23歲嘅「高倉菫」自小學開始就打籃球，據佢近日接受訪問憶述，由於自己細個非常內向，所以當時真係當籃球係佢朋友，由朝早5點參加晨練，放學又繼續練到9點先返屋企，生活基本只有籃球。後來佢開始於YouTube及TikTok上傳自己與其他網紅、YouTuber甚至現役運動員1-on-1嘅影片，好快就令佢成為日本嘅「籃球女神」，亦吸引到經理人公司嘅注意，將佢帶入演藝界。今年更開始接觸水著寫真，兩次為《週刊Playboy》嘅拍攝都廣受好評。

佢打波真係有料到架！

「高倉菫」身高只有160cm，對打籃球黎講確係有啲矮，但對於水著寫真黎講就相當標準，加上佢多年運動鍛練出黎嘅緊實身形，以及充滿陽光燦爛嘅可愛笑容，令佢不分男女虜獲大批Fans。目前佢更開始學習演戲，相信未來會喺更多節目、平台中見到佢嘅身影啦。

IG：su_n812