日本嘅結婚率及生育率近年屢創新低，唔少人為咗搵到理想嘅另一半都會顧用婚姻介紹 (婚介) 公司幫忙尋找對象。但業界人士「鎌田れい」日前就於《週刊女性PRIME》上撰文，指佢留意到搵唔到結婚對象嘅男女客人，其實都有啲共通點，並呼籲真係想結婚嘅男女要重新審視自身。

「鎌田れい」指出，日本男性嘅共通問題，就係無法正確判斷自己於婚姻市場中嘅位置。佢話唔少日本男士都認為只要自己有錢、有社會地位，就能夠搵到比自己年輕幾十年嘅女伴。例如佢就曾經見過一個雞皮鶴髮，睇落去已經似「七字頭」嘅六十五歲男子，堅稱自己睇落只有四、五十歲，並認為自己年收千萬Yen、資產上億，希望能夠搵個30-40歲嘅另一半。

「鎌田れい」表示，雖然的確有唔少「老夫嫩妻」嘅例子，但當中大多數人都係於生活中相遇，有機會互相理解後先結成夫婦。但於婚姻介紹中，所有人都係先睇對方嘅個人資料，而對於「30代」嘅女性而言，一個「年收500萬Yen嘅30代男性」，係點都比「年收1500萬Yen嘅65歲男性」吸引。

而其他日本男性經常犯嘅錯誤，包括只顧住講自己嘅嘢，忽略女方嘅說話；經常吹噓自己年輕時有幾受歡迎，但忘記依家會黎相睇就代表佢年輕時感情失敗；無戀愛經驗，唔識得對女性相處而成為「話題終結者」；唔識得計劃約會，將所有事推畀女性；外表不修邊幅；以及不停對女方抱怨工作、同事、父母，令對方感到鬱悶。

另一邊廂，日本女性亦有佢哋嘅問題。「鎌田れい」指出日本女性最常見嘅問題就係眼角太高。例如佢遇到過一位41歲嘅女性客人，即使為佢安排過超過200位對象，但客人每次都會用「呢個男人從未自己搬過出黎住，一定係個裙腳仔」、「佢年收入太高，結咗婚地位唔平等，一定係我做哂所有家務」等原因拒絕對方，並揚言「雖然我已經41歲，我知要求唔可以太高，但都唔可以求其搵個人結婚架！我希望搵個尊重我，我又鍾意嘅人！」

「鎌田れい」指出呢個世上無人可以完全符合其他人嘅要求，婚姻唔係感情嘅終點而係起點。應該要留意對方嘅優點，並靈活地與對方配合，而唔係定下一個標準，再將不符合標準的人拒諸門外。

而其他日本女性常犯嘅錯誤，包括唔夠笑容；妝容打扮「過於完美」令對方感到壓力；體形過胖；以及已經成為「乾物女」，失去對戀愛嘅興趣以及吸引異性嘅能力。

資料來源：週刊女性PRIME