自從疫情過去，大部份國家都回歸到正常生活，但一同回歸嘅似乎仲有各類罪案。好似有唔少貴金屬、珠寶店聚集嘅東京上野御徒町，今年就至少發生四宗店舖搶劫案，當中三宗嘅犯人都成功得手，唯獨上週日一宗劫案，就因為遇上使用日本武器「刺股」嘅勇武店員而失手，而該名店員後來被日本網民封為「令和本多忠勝」。

ガードマンが怖すぎる

一騎当千の戦国武将かと思ったわ

こんなん出てきたらナイフ持ってても逃げ出す自信ある pic.twitter.com/CNy0kYInAs

— ゆるふわ怪電波☆埼玉 (@yuruhuwa_kdenpa) November 26, 2023

據日本傳媒報導，上週日有三名匪徒騎電單車抵達御徒町某間貴金屬店意圖搶劫，鄰近其他店舖員工事後接受訪問時表示，當時佢哋聽到玻璃破碎嘅聲音，隨即見到三名戴頭盔男子闖入貴金屬店，但不足一分鐘三人就被一名牛頭馬大嘅店員持「刺股」趕出店外。而據附近嘅民眾拍低嘅影片可見，該名店員不停用力揮舞「刺股」嚇退匪徒，而另一名店員則乘機推倒匪徒嘅電單車阻止對方逃走，持「刺股」店員更多次用力擊打倒地電單車以作威嚇，最後三名匪徒唯有徒步逃離，持「刺股」店員仲「收刀」於背繼續追上。

日本警方事後表示，已拘捕其中兩名年僅18歲嘅匪徒，另一人目前在逃。

片段一出，日本網民都有力讚揚該名「刺股」店員，封佢為「令和本多忠勝」、「現代許褚」、「自帶BGM」，又或「持沙僧武器的豬八戒」。而由於店員身形肥壯，亦一度有傳佢係前相撲力士。不過據《集英社Online》訪問該店舖得知，其實刺股店員並非力士、亦無學過任何格鬥技，甚至唔係店內警衛，而係一位平時文靜老實嘅普通職員。據知該名店員對於事件這成轟動亦相當不安。

而其武器「刺股」其實係日本傳統武器之一，古代時前方會安裝兩到三塊刀刃，近代就改成一個金屬製半圓。主要用法係用身體頂住柄頭發力，再以半圓部份框住目標身軀或四肢，又或格擋對方武器，亦可以於前方加裝自動收緊嘅束帶加強制服力。改良後嘅刺股係日本店鋪唯一可合法配備嘅防身武器，但事件發生後日本警方強調，刺股真係用黎「防身」同拖延時間讓警方到達，並不鼓勵民眾使用刺股主動攻擊匪徒。

資料來源： るふわ怪電波☆埼玉 @yuruhuwa_kdenpa