日本嘅風俗產業世界聞名，唔少男士嘅畢生願望就係去體驗一次。不過日本嘅風俗業素來都對唔識日文嘅客人頗不友善，輕則無法體驗全部樂趣，重則直頭門口都唔畀你入又或被人當水魚咁「鋸」。好在近來日本就開咗間專門針對外國遊客，標榜「日藉團隊、精通日英雙語」嘅風俗文化體驗俱樂部，為各位解決文化語言問題！唔知各位又有冇興趣去試試佢？

位於東京歌舞伎町嘅「LUXE BAR」由日籍創辦人渡邊桂輔創立，佢表示：「「日本的風俗文化源遠流長，惟礙於語言不通，令此文化產業在世界各地的遊客眼中如同披上一層神秘面紗，叫人好奇不已且躍躍欲試。因此，我自多年前由海外回國後便積極籌備，期望可以為日本國民及環球旅客帶來最貼心的風俗體驗及享受，與大家分享此一東瀛獨有的文化特色。」

LUXE BAR本質上係大家聽過無數次嘅「陪酒孃酒吧」，不過就有兩大特色。第一就係其日籍專業團隊精通日語及英語，而且擅長與來自不同國家、文化嘅客人「進行積極熱情的溝通互動」。第二就係佢收費明確，官方資料顯示酒吧入場費為每位每40分鐘10,000日元起，費用包埋「無限暢飲一系列特色飲料」，而且有三名「日籍風俗體驗員」輪番招待（每名招待10至15分鐘）。客人亦可以為「風俗體驗員」額外點選飲料，調酒每杯2,500日元，烈酒Shot每杯3,750日元。

荷包較深嘅客人亦可以選擇直接開房——開VIP房。入場費為每位每40分鐘25,000日元（最多八人），同樣有無限暢飲同「風俗體驗員」招待，另外需要開多支43,750日元嘅香檳，如要為「風俗體驗員」點酒嘅價酒亦會稍高（調酒每杯2,700日元，烈酒Shot每杯4,050日元）。另外VIP房客人亦可以指定「風俗體驗員」，不過就要另外每40分鐘3,750日元。

另外店內亦提供多款著名烈酒，例如「白州18年單一麥芽威士忌」（500,000日元）、「山崎12年單一麥芽威士忌」（125,000日元）等日本威士忌；「Krug 2006」（562,500日元）、「Armand de Brignac Blanc de Blancs (Silver)」（750,000日元）、「Dom Pérignon Plénitude P2 Vintage 2004」（625,000日元）等香檳。主要都係為咗供大家展現財力、「感謝」招待員服務之用。

LUXE BAR位於日本東京都新宿区歌舞伎町1丁目10番3号G3ビル4階，營業時間為每日下午6時至凌晨1時。

資料來源：Luxe-Shinjuku