廣義嘅「成人產業」包含多個不同工作，由完全唔使出街嘅「網絡直播」，到幾乎喺條街到返工嘅「妓女」都屬於「成人產業」，而近日有個新研究就發現，即使同屬成人產業，大家對於不同「工種」嘅觀感都可以非常唔同，甚至形成一個「婊子階級（Whorearchy）」，當中又以從事「網絡直播」嘅女性最「高級」、「妓女」為最低級。

來自加拿大Brock大學心理學系嘅碩士生Hanna Puffer有見疫情期間有大量女性轉向Onlyfans等成人平台試圖賺取外快，於是決定研究大眾對不同成人產業工作嘅觀感。佢先搵黎298名18歲以上嘅美國受訪者，向佢哋提供「網絡直播」、「包養（Suger Relationships）」、「妓女」及「AV女優」四個工種嘅定義及描述，再要求佢哋按個人感知，對於以上工種嘅剝削、傷害、賦權、利益、危險及獨立性作出評價，以得出受訪者對四個工種嘅觀感。

結果就發現，受訪者認為「最偏好」網絡直播，認為能夠為女性提供最多嘅能動性（agency，即個體有多少資源及權力去滿足潛力），而且對自己嘅傷害最低。同時由於女性對網絡直播嘅控制及安全性都最高，所以被視為能賦權於女性。「包養」嘅能動性雖然冇網絡直播咁高，但由於比起單純嘅性交易多咗種尊重及理解，所以排第二。「AV女優」嘅提供嘅能動性比上述兩個都少，危險性亦相對較大，所以排第三。而最底層嘅「妓女」則被視為又危險，又易被剝削，而且對身心有害。

另外，研究亦發現受訪者嘅個人價值觀及性別，都會影響佢哋對成人產業嘅觀感，例如受訪者嘅「右翼獨裁」（即保守派）支持傾向越高，佢哋對於成人產業嘅睇法就會更負面；而男性對於成人產業嘅觀感，平均而言亦比女性為高。

資料來源：Attitudes Toward Cisgender Women’s Participation in Sex Work: Opportunity for Agency or Harmful Exchange?