現代社會多數奉行一夫一妻制，但偶爾都會有萬中選一嘅奇男子，憑住旁人無法理解或複製嘅特質，令多位女性心甘命抵咁跟住佢，而現年36歲嘅日本男子「渡部竜太」就係其中之一。目前過緊一夫四妻生活、IG上有超過1.5萬Fans嘅佢，早前接受日本傳媒訪問，大談自己嘅感情史、妻子之間嘅升降級制度，以及佢嘅最終目標。

左起：渡部竜太、「第一夫人」陽咲、「第二夫人」彩花、「第三夫人」千晴

圖片：渡部竜太（@watanaberyuta_official）• Instagram 相片與影片

「渡部竜太」早前接受《日刊SPA!》訪問，透露自己點樣成為佢自己口中嘅「由老婆養的軟飯男」。佢指自己嘅原生家庭非常普通，爸爸揸的士，媽媽係家庭主婦，所以一夫多妻呢個念頭唔係來自原生家庭，而係來自一次感情失敗。

佢指自己30歲時曾經交過一個未夠18歲、祖母係位「億萬長者」嘅女朋友。雖然對方當時未成年，但佢已經同對方家長打好招呼，甚至已經搬入對方屋企居住，而且對方嘅祖母似乎亦相當鍾意佢，除咗會親自教佢做生意，家族旅行亦會預埋佢，結婚似乎只係時間問題。但突然之間，女友就向佢表示「與年收不足4000萬Yen（約HK$200萬）嘅男人一齊很困難」，向「渡部竜太」提出分手。

「渡部竜太」於YouTube上傳與三位太太及兩名子女嘅生活片段

呢次分手令「渡部竜太」撤底放飛自我，立即下載交友App瘋狂約女，高峰時曾經同時有16個女朋友，後來因為經常搞錯女朋友啲名所以「減少」到12個，當中就有目前嘅第一夫人「陽咲」及第四夫人「千尋」兩位。「渡部竜太」表示，最早佢其實係同「千尋」開始「事實婚姻」，後來「陽咲」先加入。不過體重曾經超過100kg、努力減到70kg左右嘅「千尋」過去幾年多次離家出走（YouTube影片中亦鮮少見佢出現），所以後來先被「降格」成「第四夫人」。

對於兩位夫人共存會否有爭執，「渡部竜太」就表示之前就一直都係三人行，佢亦係見到二人能夠平衡相處先提出三人同居。但即便已享齊人之福，「渡部竜太」都繼續於交友App尋找下一位「夫人」，於是就認識到後來嘅第二夫人「彩花」。「渡部竜太」表示一開始冇向「彩花」透露感情狀況，但到大家感情穩定後佢就不停暗示自己仲有其他女人，直到佢某次準備同「彩花」去沖繩旅行，竟然叫「陽咲」揸車送佢去，兩女首次見面。但由於佢之前打足預防針，所以「彩花」好快就接受現實，仲取消埋自己租約搬去同居。

至於第四夫人，就係佢同「陽咲」、「彩花」去北海道旅行時，心血來潮想要個北海道女友，所以立即用交友App識返黎。

在 Instagram 查看這則貼文

渡部竜太（@watanaberyuta_official）分享的貼文

「渡部竜太」指自己總共有9個小朋友，當中最大16歲、最小嘅兩個目前由佢哋一家照顧，但佢嘅目標係打破江戶幕府第11代將軍「德川家齊」有53個仔女嘅紀錄，所以佢目前都仲好努力咁搵緊新老婆。「可惜」嘅係，好多女伴（有唔少係外國人）接受唔到一夫多妻嘅生活，仲有人大罵佢係「日本第一渣男」。所以能否達到目標，似乎仲係未知之數。

資料來源：日刊SPA!