近年歐美各國政府認為青少年過早接觸成人內容，會影響佢哋嘅身心健康，所以紛紛推出更嚴格嘅成人內容年齡監管，亦導致Pornhub等成人網站封鎖美國多個州份嘅IP地址。之但青少年於唔同年齡接觸成人內容，究竟對佢將來有咩影響呢？美國猶他州立大學人類及家庭研究學系嘅團隊早前就發佈咗一個研究，指會對青少年長大後嘅性伴侶數目、人生滿意程度等多個方面有關。

圖片：Pixabay

研究團體採用咗於2015年收集、包含1,055名年齡介乎18至72歲，平均年齡32歲北美成年人嘅樣本，並分析佢哋開始接觸成人內容嘅年齡，與佢哋長大之後嘅人生滿足度、性行為之間嘅關係。其中一個發現，就係青少年越早接觸成人內容，將來嘅人生就更傾向擁有更多性伴侶。研究指出接觸成人內容或會影響青少年嘅性行為（例如可能更開放），導致將來嘅性伴侶數字增加。

圖片：https://cdn.tarnkappe.info/wpimg/dsa-pornhub-wird-von-der-eu-mit-strengen-auflagen-belegt

但你又唔好以為細細個就睇AV係好事喎。事關研究亦發現於16歲之前接觸成人內容嘅受訪者，入生滿足度比起更大個先接觸，或者根本冇接觸過成人內容嘅人低、長大後睇成人內容嘅次數亦比其他人高、亦會更傾向接受有虐待或脅逼性嘅成人內容。換言之就係從小接觸成人內容嘅人，長大後睇得更多、更重口味而且可能更唔開心。

資料來源：The Impact of Timing of Pornography Exposure on Adulthood Outcomes of Life Satisfaction, Sexual Attitudes, and Sexual Behavior