近日一個美國研究發現，研究樣本中嘅23名男性成年人以及47隻狗隻嘅睪丸中，全數含有被稱為「微塑膠」嘅細小膠粒，當中人類睪丸嘅微塑膠含量更係狗隻嘅3倍。目前估計微塑膠可能係近代男子精子數目越見下跌嘅原因之一。

圖片：Pixabay

近年「走塑」之所以成為熱潮，其中一個原因係有越黎越多研究證實從塑膠製品分解出黎嘅「微塑膠」已經佈滿整個生態環境，並透過進食等方式一層層往食物鍊上層聚集，而處於食物鍊頂端嘅人類當然亦唔能夠倖免。近日美國新墨西哥州大學嘅一個研究，就測量咗23名年齡屆乎16至88歲嘅男性人類屍體、以及47隻雄性狗隻嘅睪丸中嘅微塑膠含量。結果發現狗隻每一公克睪丸組織當中，有123微克（百萬份之一克）微塑膠；而人類嘅數字更高達330微克，幾乎係狗隻嘅三倍。

圖片：Pixabay

由於人類組織來自屍體，所以無法測量睪丸內嘅精子含量。但研究團隊就測量咗狗隻睪丸樣本內嘅精子含量，結果發現微塑膠含量與精子量成反比，換言之睪丸內微塑膠越多，精子數就越少。研究團隊指出PVC塑膠會釋放出大量影響精子生成過程及內分泌嘅化學物質，所以估計微塑膠亦會影響人類嘅精子數目。

過往已有研究於人類血液、胎盤以及母乳中發現微塑膠，亦曾有研究發現微塑膠會於實驗室環境中破壞細胞結構。換言之微塑膠對人體、甚至人類將來的確可能造成巨大影響。

資料來源：The Guardian