受各種媒體影響，男士們都希望自己於床上能夠金槍不倒，要幾耐有幾耐。而近日外國網上就再次討論起一個能夠將射精時間（即男性開始活動到高潮嘅時）延長7倍嘅療法，不過過程中你就需要去「電」自己嘅下體，而且係每次半個鐘、每個禮拜三次仲要維持半年，你又會唔會想試呢？

其實呢個療法早於2022年就已經有外國傳媒報導過，不過近來又被網民拎返出黎講咁解。話說當年黎巴嫩大學嘅一名泌尿科醫生，遇到一位當年28歲、啱啱識咗個新女朋友一年嘅病人。據呢位病人指出，佢同女友大概每週做愛兩次，但幾乎每次佢都會於40秒內高潮，因而被診斷為早洩。而Mohamad Moussa醫生就決定為呢位病人嘗試一種新療法，利用低頻電流刺激佢嘅陰莖背神經 (dorsal penile nerve)，每次療程需時30分鐘，每個星期要進行三次療程。而經過半年療程後，病人嘅射精時間就由40秒延長至3分54秒，而即使療程完結後，病人嘅射精時間亦一直延長，到14個月後達到5分鐘，亦即延長咗超過7倍，同時達到英國國民保健署 (NHS) 列出嘅男子平均射精時間。

圖片：Mirror

如果你都想試試呢個療法嘅話呢，咁有兩樣嘢係必須要注意。首先由於目前（至少係兩年前）只有上述一個案例，所以只能推斷呢個新療法「可能可以治療某種早洩問題」，如果你係有其他目的想延長射精時間的話，同一個方法未必有用。第二就係，即使Mohamad Moussa醫生其實都唔太肯定點解呢個新療法會有效。目前只能估計，由於男性射精嘅動作係由「球狀海綿體肌」及「坐骨海綿體肌」收縮而發動，而用電流刺激陰莖背神經「似乎」會干擾呢兩舊肌肉嘅活動，減慢佢哋嘅收縮時間，達到延長射精時間嘅效果。

簡單黎講，就即係呢個方法仲需要更多嘅研究先能夠被判定為有效。

資料來源：Mirror、Transcutaneous dorsal penile nerve stimulation for the treatment of premature ejaculation: A novel technique