情侶之間嘈交可以話係必要嘅事，但嘈交始終傷感情應該可免則免。過去曾經有研究指出，情侶若發現對對方嘅不滿或憤怒開始累積，短暫從對方身邊離開能有效減低真係嘈起來嘅機率，但個問題就係離開幾耐先係「暫時」？最新嘅一個研究就指出，5秒就可能已經足夠。

來自蘇格蘭St Andrews大學嘅三位心理學家早前做咗個研究，搵黎81對自願參加嘅伴侶，去玩一個設計上就係要雙方發生衝突嘅雙人互動遊戲，並以360度鏡頭及咪高風，配合機械學習程式分析兩位玩家嘅即時情緒（即係有幾嬲、對對方有幾不滿）。每對伴侶都要玩30個回合，而主持人就會於不同時間，要求伴侶進行長短不一嘅暫停，睇下暫停完之後雙方嘅情緒有冇較為平復。

結果就發現，只要於真係發火之前暫停互動5秒，就已經有效減低佢哋嘅不滿及憤怒程度，更重要嘅係即使暫停時間變長（10或15秒），效果都同暫停5秒相差無幾。研究團體總結指出，暫停本身就能夠緩和雙方之間嘅緊張情緒，暫停時間長短反而唔係重點，5秒已經非常足夠。亦即暫停係一個唔需要任何外力、工具幫忙，只要有心有意志就能用嘅避免爭吵方法。

資料來源：Both partners’ negative emotion drives aggression during couples’ conflict