「睇AV」其實老早就唔係男人嘅專利——你去望下三上悠亞有幾多女Fans就可知一二——而據Pornhub等著名成人網站公佈嘅用戶數據，甚至有將近1/3用家係女性。但有趣嘅係，呢批女性大部份都唔係去睇大家熟知嘅男性向AV，而係不論自身性取向，都傾向去睇女同性戀嘅AV。

而為咗了解女性嘅觀看原因，來自以色列Ben-Gurion大學嘅博士生Rotem Avgar就進行咗一系列研究。除咗引用Pornhub等網站嘅公開數據，以及15篇有關女性描述自己觀看AV習慣嘅文章，仲對Pornhub上觀看次數最多嘅10部女同性戀影片進行內容分析（即係將影片中出現嘅元素、對白等元素分門別類，再統計不同主題嘅出現頻率），最後整理出異性戀女性之所以喜愛女同性戀AV嘅五大原因。

圖片：Pixabay

第一個原因，就係因為女同性戀AV重視女性嘅快感。傳統男性向AV著重嘅男性嘅快感，女性嘅快感只係次要目的，而唔少異性戀女性都表示對此感到沮喪。對比之下，女同性戀AV則花更多時間於前戲、口交、顯然易見嘅女性高潮。而且影片中嘅演員都會分別接受及給予歡愉，更會有至少一個女性獲得高潮。

另一個原因就係能夠身同感受。男性向AV中嘅女性通常都跟隨一個狹窄而且跨張嘅審美觀，但女同性戀向嘅AV則會出現更多更真實嘅體型及外貌，而且較少出現隆胸、濃妝等極端改變身體嘅元素。令女性觀眾更容易共情。

圖片：Pexels

第三個原因就係女同性戀向AV較少貶低女性。唔少異性戀女性都認為男性向AV太過粗暴、或者侮辱女性演員。而部份女同性戀向AV中雖然亦有粗野或權力不對等嘅元素，但整體而言都係更平等，就算有都係為咗雙方，而非單方嘅快感。

第四個原因係真實性。簡而言之就係女同性戀向AV中嘅演員似乎真係樂在其中，獲得高潮嘅方法亦較貼合現實。而非如男性向AV中嘅演員一樣係靠演技。

最後一個原因就係提供幻想空間，令異性戀女性唔需要改變性向，都能探索新嘅元素。

你可能會問，作為一個男人，點解要知女人睇咩AV呢？但大家應該都聽過唔少專家警告「AV教壞人」，當中嘅「壞」其實多指男性向AV中從「大小」到「時間」以至各種技巧嘅誇張手法。而當你知道女性睇AV追求啲咩嘅時候，或者會令你更了解對方於床上需要啲咩，雙方就能有更有趣嘅閏房之樂啦！

資料來源：“Boys just ruin it”: Exploring the popularity of lesbian pornography among straight women