「潮吹」（Squirting）除咗係部份女性高潮時嘅正常生理反應之外，亦係不論東西方AV中常見嘅題材，甚至有唔少「學壞手勢」嘅男性一直認為佢係女性最有快感嘅表現，並以其為一生床上目標。但大家又知唔知「潮吹」噴出黎嘅究竟係咩？美國科學媒體《Scientific American》YouTube早前就引用科學研究解釋潮吹嘅來源，或者可以為大家提供答案。

其實單從「潮吹」噴出黎嘅位置，以及女性身體嘅嗰附近究竟有咩器官能夠藏有大量水份，大家應該都可以推斷出所謂「潮吹」其實就係「尿液」。不過近年隨住鼓勵女性性自主嘅風潮，唔少人都拒絕將非常具有象徵性意義嘅潮吹「貶低」為「尿」。不過於節目中，兩位主持人就引用咗法國婦科學者Samuel Salama嘅一個研究，再次證明潮吹嘅來源。

Samuel Salama嘅研究其實非常簡單，佢搵咗7個有穩定潮吹反應嘅女士，並於實驗室內完成整個「潮吹」過程。過程中研究人員會分多次利用超聲波再檢查佢哋膀胱嘅狀態，結果就發現當佢哋潮吹完膀胱就會變空。換言之就確定噴出黎嘅液體的確係來自膀胱，亦即係「尿」。

但故事未完呀！縱然噴出黎嘅液體的確係尿，但其實所有女性於實驗開始之前，都被要求去廁所清空膀胱。換言之最終噴出黎嘅液體，係由女性開始接受刺激到獲得高潮之間嘅時間內再次注入膀胱，亦即「膀胱快速補滿」係呢啲女性獲得快感時嘅身體反應之一。而此機制背後嘅原因暫時係未知嘅。

另外，有其他研究分析過噴出黎嘅液體嘅成份，並發現當中除咗尿液常見嘅物質之外，有時仲會有來自被稱為女性前列腺、於性愛時分泌出以作潤滑之用嘅「斯基恩氏腺」（Skene's glands）分泌液。換言之「潮吹」又的確唔一定「100%都係尿」。

資料來源：Scientific American