如果你有留意過網上嘅兩性感情討論，就會發現久唔久就會有女性投訴遇上「鋼鐵直男」曖昧對象，無論做幾多暗示對方都好似Get唔到咁。而如果你睇到呢到後個腦諗緊嘅係「啲暗示究竟係啲咩？」嘅話，冇錯，你就係佢哋口中嘅「直男」啦！而如果你唔想未來繼續錯過良緣，咁就要留意以下由外國「約會教練」就分享嘅五個「女生對你有興趣時會做嘅小動作」！

據於TikTok及IG上擁有近70萬追蹤、自稱為「男性約會教練」嘅Gracie Pleschourt指出，女性嘅一啲小動作其實會透露出佢對你係咪有興趣，當中包括「玩頭髮」、「調整上衣」、「玩身上嘅飾物」、「側頭並聆聽」以及「觸碰自己嘅嘴唇」。

從中大家唔難發現，五個小動作之中有四個都屬於「女性觸研自己身體或身上物件」嘅範疇，而呢啲動作背後其實都有相應嘅社會心理學研究支持。例如有研究指出，女性頭髮與嘴唇嘅狀態其實能夠展現其健康及生育能力，而女性觸碰呢啲位置就係希望你去留意佢嘅身體，展現自己係適合交往與生育。咁點解佢想你知道佢適合交往及生育呀？咪就係因為對你有興趣囉！

在 Instagram 查看這則貼文

⭒ Gracie Pleschourt ⭒ Dating Coach For Men（@datingwithgracie）分享的貼文

但大家亦需要留意，不同文化對於理解不同身體語言亦有影響。例如唔少西方國家嘅研究都指出長期維持眼神接觸都算係調情嘅表現；但對於相對保守嘅東方文化而言，「長期維持眼神接觸」有可能會被理解成「睥」，係一種冒犯嘅行為，特別係第一次見面嘅時候。所以各位男性於分析女性嘅身體語言時都要小心啦。