過去唔少與兩性擇偶行為有關嘅研究都認為，所謂「具外表吸引力」嘅身體特徵，例如臉部左右對稱呀、男要有肌肉、女要有前有後等等，其實都係生育能力強嘅表徵，換言之大家想要「外表吸引嘅另一半」背後，其實係「想要一個可以共同養育健康下一代」嘅人。不過呢類進化生物學嘅觀點，只能解釋大環境趨勢，解釋唔到點解某啲時候我哋特別想要一個外表吸引嘅另一半。而近日美國一個新研究就給出可能嘅答案：因為你性欲強。

來自美國田納西州Rhode學院嘅Sierra D. Peters等研究者，早前進行咗一系列實驗，以探究「性欲高低」與「追求有外表吸引力另一半」之間嘅關係。佢哋首先搵黎超過500名美國成人，透過問卷紀錄佢哋當刻嘅性欲高低，然後再要佢哋完成一個「另一半配點」任務，即係要求佢哋將有限嘅「技能點」分配於另一半嘅各個特質，例如外表、創意、活力等等，從而得知佢哋希望另一半擁有邊啲特質。

結果就發現，不論男女，只要係性欲較強嘅人，就傾向分配更多點數於「外表」之上。換言之性欲高嘅人，就會傾向重視另一半嘅外表。

研究團隊之後再進行另一個測試，搵黎超過1,000名美國大學生，並將佢哋隨機分成兩組，一組被要求回憶並寫低經歷強烈性吸引嘅經歷，以提升佢哋嘅即時性欲，另一組作為控制組就只係寫低開心經歷，然後兩組人都要完成上面提到嘅「配點」任務。

結果同樣發現，被提高性欲嘅組別，都會將更多點數分配到「外表」之上。更有趣嘅係，因為男性嘅平均性欲水平會較高，所以過去研究都認為男性更傾向著重另一半外表，但今次研究就發現，女性性欲強時嘅選擇，其實同男性非常相似。換言之不論男女，對於另一半外表高低嘅重視程度，其實都會隨佢當刻嘅性欲高低而變化——如果你一直都好重視另一半嘅外表，就可能係一直都性欲高囉。

資料來源：The evolved psychology of mate preferences: Sexual desire underlies the prioritization of attractiveness in long-term partners