日本係唔少人去旅行嘅首選之地，近日甚至有報導指日本上半年嘅旅客數字急增21%，全年有望達4000萬人次成為全球第一。但相信經歷過當年一街都係水貨客嘅香港人，應該深知所謂「觀光公害」有幾咁影響民生。近日有日本媒體就報導，因漫畫《Slam Dunk》而聞名嘅「鎌倉高校前駅」附近一帶，因為太多遊客前往而嚴重影響環境衛生，甚至人生安全。算係揭示日本人面對大量旅客來訪嘅慘況。

位於神奈川縣鎌倉市內嘅「鎌倉高校前駅」，因為係《Slam Dunk》等多部動漫嘅取境地而成為Fans們必去嘅景點，但事實上呢個位於市郊嘅車站根本就無應付大量旅客嘅配套，結果就影響到附近居民及商店嘅日常生活。

雜誌《FRIDAY》近日到實地走訪當地居民，其中車站附近嘅「鈴木病院」負責人就表示：「尤其係職員大多放假嘅週日，隨處便溺更是肆無忌憚（原文：放題）。到週一朝早巡視醫院附近時，總能在各處角落發現排泄物。而且不僅是小便，大便也屢見不鮮。常有外國人用中文表示『非常緊急，請借廁所一用』，但使用後不僅髒亂不堪，更有人擅自拔除馬桶座電源線為手機充電。最令人愕然的是，曾有人入廁所後換上婚紗出來。」

另外附近嘅居民亦表示曾見過有旅客於海邊停車場靠同伴遮掩當街小便；當地居民嘅宅配箱經常被人當成投幣式儲物箱使用，亦經常有人隨處棄置損毀嘅行李箱（行李箱屬大型垃圾，應要電話預約回收及支付費用）。結果就係當地居民為咗自家環境而要幫人執手尾。

如果話大小便、垃圾都只係影響生活質素，咁旅客所帶來嘅交通問題就真係影響人生安全。當地居民指好多旅客都會僱用「白牌車」，又或租車自駕前往。但當地根本無咁多停車位容納咁多部車，結果啲車就違法佔用居民嘅私人車位。當居民作出投訴時，呢啲大多講韓文或中文嘅司機就會用翻譯App惡人先告狀。8月底時一名當地男中學生因為見到違例泊車，勸告無效後報警，結果司機大罵男學生，並開車撞倒其單車後離去。有居民表示唔少人都因為無法忍受類似嘅觀光公害而選擇搬屋。

《FRIDAY》針對事件向當地觀光課查詢時，只係獲得「正與相關人士及機構反覆協商，全力推進應對措施。」嘅官腔回答。事實上就算當地政府真係想出手，都肯定唔係一時三刻就能夠改善問題。報導最後甚至直指「惡質觀光客的犯規行為，絕不應再被容忍」，可見日本人嘅憤慨。

資料來源：FRIDAY