講起俗稱「事後丸」嘅緊急避孕藥，唔少人可能都覺得係「做錯事」、「唔小心」嘅人先至會食，但其實呢個議題仲同女性身體自主有關。而近日日本政府就於呢個議題上向前邁進一大步，開放市售緊急避孕藥。

緊急避孕藥並唔係咩新產品，但唔少地區（包括到目前為止嘅香港）均要醫生處方先可以拎到藥，換言之有需要嘅人要主動去睇醫生，同醫生透露自己發生過咩事，先有機會拎到藥。無論係對於「一時衝動」嘅人定係性侵受害者黎講其實都唔係易事，可想而知會嚇退唔少人而失去保護。

而今年8月，日本當局就通過咗由明治製藥旗下Aska Pharmaceutical 申請嘅非處方緊急避孕藥「Norlevo」，日前（20日）日本厚生省亦正式承認該藥物。由於係非處方藥，所以有需要人士無須先去睇醫生，只需要去到有註冊藥劑師駐守嘅藥房就可以買到。規矩亦寫明對購買者無年齡限制，亦唔需要有親人陪同。不過藥劑師就要紀錄購買者嘅年齡，購買者亦需要於藥劑師面前服用藥物。

早於2023年日本就已經開始試行非處方嘅緊急避孕藥，當時限制16歲以上方可購買，18歲以下需要提交家長同意書。截止今年一月，整個試行期間全日本賣出約6,800劑，絕大部份為20歲以上成年人，僅得9%為16至19歲人士。購買者亦表示對於解說及私隱保護方面感到滿意，不過價錢方面就唔太滿意，事關一劑要價7,000至9,000Yen，即約HK$360-460左右。

資料來源：山陽新聞