唔少男人嘅最大幻想，就係可以憑一己之力，於床上將伴侶搞到高潮疊起、面容扭曲、喂嘩鬼叫。但你有無諗過，我哋其實係無辦法單從表情分辨出其他人究竟係「高潮樣」定係「痛樣」？亦正因為咁，所以AV中嘅女優就要刻意表演出誇張嘅「高潮樣」黎說服觀眾，結果又導致現實生活嘅女性要「扮」高潮黎滿足男性？《PsyPost》早前就整合咗多個學術研究，同大家拆解下「高潮樣」嘅秘密。

《90男歡女愛》中的美琪·賴恩

報導首先指出，人類嘅「高潮樣」同「痛樣」其實非常相似，甚至可以話係難以分辨。有研究就將多張運動員勝利之後嘅「激動樣」、人們接受穿環時嘅「痛樣」、以及真正嘅「高潮樣」表情畀受訪者去分，結果發現人們根本無法單從表情準確分辦相中人究竟係咩狀態，甚至有人認為「高潮樣」比起「激動樣」更似負面情緒，直到研究團隊提供埋身體圖片準確度先會拉高。但有趣嘅係當研究人員混合「表情」及「身體圖片」，例如「高潮樣」配「穿環身體圖」時，受訪者亦會將其分辨為「痛」，顯示人其實更靠身體語言（而非表情）黎判斷其他人嘅狀態。

而唔同文化對於「高潮樣」嘅理解亦唔同。另一個研究用電腦生成咗一堆扭曲表情，並要求來自西方國家以及東亞國家嘅受訪者分別去分辨表情係「痛」、「高潮」定「兩者階非」，從而得出兩種文化對於「高潮樣」嘅理解。結果發現西方人心目中嘅「高潮樣」係擘大眼、嘴部垂直拉長（即係橢圓形嘅O形嘴）；但東亞人心目中嘅就係「閉眼微笑」。反映文化會影響人對於性快感表現嘅期望。

圖片：Pixabay

亦正因為從表情好難分辨出「高潮」與否，所以成人影片就要落足功夫去「說服」你片中女優有高潮。另一個研究分析「著名成人影片網站」上頭50條最多人睇嘅成人影片後，發現「男性高潮行為」（即係射精）嘅出現頻率好高，但「男性高潮表情」嘅出現率就好低；反過來「女性高潮行為」出現率低，但「女性高潮表情」嘅出現率就好高。分析指出成人影片嘅主要觀眾係男性，唔展示「男人表情」係為咗增加代入感；同時因為「女性高潮行為」其實好唔明顯，為咗說服男性觀眾女優真係好舒服，就唯有指示女優用誇張表情表達。

問題係當男性睇得多成人影片後，就係以為女優嘅誇張表達先係「真正」嘅高潮，結果就令到現實生活嘅女性要刻意做出「正確」嘅高潮表情，甚至直頭「扮」高潮黎滿足男性。顯示出「生理學現實」與「文化期望」之間嘅差異。

圖片：Pixabay

咁睇完呢堆研究我哋有咩得著？既然從表情分唔出「痛」定「高潮」，甚至可能會令伴侶產生壓力而要做戲，咁或者大家都應該著重於對方嘅整體反應。記得報導一開始話表情加埋身體先可以準確判斷狀態嗎？或者各位男性都唔應該淨係追求對方「表情開心」，而係身體反應都開心，咁先會有更完滿嘅親密體驗啦。

資料來源：PsyPost