大家都知喺香港去飲做人情有公價之餘，對於金額數字都有忌諱。而其實日本都有類似嘅習慣，會避開某啲數字而且通常齊頭。不過早前有個日本新娘拆人情時，就發現老公有個朋友封咗非常零丁嘅30,011Yen人情，結果佢去同老公講時，老公竟然話對方係個好朋友。究竟「30011」呢個數字有咩咁特別呢？   

據日媒《Financial-Field》報導，日本人去飲嘅人情（日文叫祝儀）銀碼其實都有忌諱。一、兩萬太寒酸無人會包，4及9兩個數字就因為分別與「死」及「苦」同音而會避開；另外雙數開頭嘅數字（例如2萬、6萬等）因為可以被2整除，有分開、緣份已完嘅含義，所以同樣唔會用。喺呢啲前題，賓客實際上可以選擇嘅數字其實唔多，其中3萬就係朋友、同事間嘅公價。

咁點解上文中嗰位朋友又要寧寧舍舍加多11蚊呢？事關「30011」就係3萬以上第一個質數，即係除咗1同佢自己之外無法被其他數整除。換言之「30011」呢個數字就係「避開雙數開頭」邏輯嘅威力加強版。而呀老公就係因為理解到對方有額外花心思，所以先話對話真係好朋友。

除咗「30011」之外，日本仲有其他別有含義嘅零頭人情金額，例如「31416」就係用圓週率黎代表「永無止境」，另外想大手筆啲嘅，「50021」就係5萬以上第一個質數。

雖然成件事睇落就充滿「理科人的浪漫」，不過我就唔建議你對香港朋友咁做，封809、1511咁。一來香港所有利是都有避開「硬嘢」嘅習慣，而「質數人情」就一定有零頭；二來除非你講到明，唔係大部份香港人應該都唔會諗到「質數」呢個點，一陣好似《我要做Model》咁畀人即場的上台問就唔好啦係咪？

資料來源：Financial-Field