作為一個男人，玩下交友App係好合理，而我覺得呢類APP最偉大嘅唔係畀你識到女仔——因為大家都知其實唔係好識到——而係佢會令你覺得呢個世界好似好多女任你揀，而你只需要向左捽、向右捽就可以評定佢夠唔夠班認識你，呢種虛榮心真係完全滿足到「魯蛇」們嘅心態。而近日Tinder就秘密推出咗新功能「Tinder Select」，等一班「名人或外表出眾人士」有自己嘅「秘密圈子」。

根據《TechCrunch》報導，Tinder用咗六個月時間研發新功能，而且唔係另一個新APP，而係目前Tinder入面內置嘅另一個功能，用戶可以自行於普通Tinder以及Tinder Select中切換。Tinder Select以藍色為主調，與以橙色為主調嘅普通版作出分別。

不過大家最想知嘅應該係Tinder Select同普通版有咩分別。目前知道嘅係有部份Tinder用戶收到秘密測試嘅通知，而呢張名單似乎就係根據Tinder嘅內部評分「Tiner Elo」黎決定。而Tinder Elo就以用戶心儀嘅類型、年齡以及配對率計算出黎，簡單啲黎講就即係越多人揀就越高分。而又根據常識，有錢、後生、靚仔嘅男男女女自然會高分啲，難怪目前被選中嘅人都係公司高層、名模等人。

圖片：TechCrunch

咁如果我冇咁高分，又可以點樣加入呢？據知每位受邀嘅用家可以再邀請一位用戶加入Tinder Select，再一次印證識人好過識字。之於點解Tinder會推出一個咁神秘嘅功能？有指就係想留住一理高端用戶喎。

咁你又問如果你唔靚仔、唔有錢又唔係名人，知道呢個消息有咩用呢？其實冇架，得個知字咁囉。就好似你玩Tinder都係得個捽字咋嘛唔係咩？