新型肺炎（又稱武漢肺炎、中國新型肺炎）疫情席捲全球，影響之大已經唔係大家戴下口罩、洗多幾次手、出少幾次街就冇事，而係影響緊未來大家嘅生活。除咗之前講過可能會冇戲睇，黎緊仲可以冇錶買，事關瑞士錶廠因為疫情相繼停工。

據知名腕錶網Hodinkee報導，Rolex CEO Jean-Frederic Dufour於當地時間16日向員工出電郵，指因應疫情，Rolex旗下三間銀廠，包括位於日內瓦嘅一間都會由17日起停工10日至27日，假如疫情持續或會延後復工日期，隨後「錶王」Patek Philippe亦跟進，宣佈停廠十日。另一錶廠Hublot亦宣佈關閉工廠真指另行通知。

瑞士目前已經有超過2600宗確診個案，加上國境南部正是歐洲疫情最嚴重的北意大利，瑞士於3月16日宣佈進入緊急狀態，商鋪餐廳全部停市。

值得一提嘅係，即使早前疫情未傳入歐洲，瑞士錶廠已經面臨難關，因為其主要收入來自中國等亞洲地區，而因為美中貿易戰、瑞士法郎強勁等多個原因，瑞士錶廠本來就受影響，依家再黎多單中國新型肺炎，唔單止買錶嘅人少，連腕錶零件供應亦因中國停工而受阻。難怪有人指出瑞士錶廠應在疫情後重新佈局，不能過份依靠單一市場。