大半年冇得去旅行，相信好多人都非常掛住日本，但喺香港除咗去食下日本嘢、行下日本城之外，究竟仲有咩方法去填補大家對日本嘅掛念？依家有多一個方法，就係銅鑼灣嘅Lounge Hakuba。

Lounge Hakuba由三位非常鐘意去日本滑雪嘅九十後香港人創立，亦正因為佢哋鍾意去日本滑雪，所以Lounge Hakuba就係以日本登山滑雪勝地白馬 (Hakuba) 嘅Lodge Bar為設計靈感，希望於香港鬧市中都重現到日本雪山酒吧嘅感覺。Lounge Habuba內部使用大量木材，感覺溫暖柔和，加上極高樓底，令空間感更開揚。如果想再空曠啲，佢外面仲有個露天人工草地，擺咗好多戶外主題嘅用品及傢具，非常適合打卡。

去到酒吧當然就唔係齋坐同影相就算，Lounge Hakuba亦提供以「滑雪Resort」為靈感而設計嘅Cocktail，例如アルプスの朝食 (阿爾卑斯山的早餐)就係用冷泡咖啡Rum，加入烙煎茶口味嘅利口酒、蕎麥味糖漿及朱古力苦精，飲嘅時候再加入鮮牛奶，甜度十足；而「初露」就由本土Gin酒「白蘭樹下」嘅創辦人Kit Cheung所創，於白蘭樹下中加入意大利出產嘅italicus、紫蘇味利口酒及湯力水，飲落有紫蘇味之餘，後勁仲有佛手柑。

初露

另外Lounge Habuka仲有號稱全港首創嘅「水煙Omakase」，據說會根據客人喜好及心情，調配出獨一無二嘅口味，當然你亦可以喺佢個有成60款不同口味嘅Menu中慢慢揀，再唔係都有以日本登山小鎮為靈感嘅「Summer Furano」及「Winter Wonderland」兩款獨家口味。

目前Lounge Habuka做緊夏日優惠，於星期日至星期四下午3時至7時，以 HK$498 優惠價享用一款水煙、兩杯精選菜單內的紅白酒、啤酒及一般調酒及一款小食。有興趣可以去官方FB或IG，又或者打電話預訂。

地址: 銅鑼灣謝斐道535號 Tower 535 302室

營業時間: 星期一至星期日 下午5時半至凌晨2時

暫時營業時間: 星期一至星期日 下午3時至晚上9時