除咗大家都講得出名嘅瑞士腕錶品牌，其實呢個世界仲有好多你未認識，但擁有上乘製錶工藝嘅獨立品牌，而且由於冇咩品牌包袱，佢哋更願意去製作一啲創新、特別、甚至可以稱為「怪」嘅腕錶。例如瑞士獨立品牌Cyrus就以立體月相、垂直陀飛輪等高端獨特嘅設計，走出一條屬於自己嘅路。而品牌最新推出嘅，就有呢隻「Klepcys GMT Retrograde」。

所謂GMT (兩地時間)，亦即腕錶可以同時顯示兩個地區嘅時間，方便經常往返不同時區的人士。而錶盤上最顯眼的藍色大半圓圈，正正就係顯示第二時區嘅副錶盤，特別要留意嘅係第二時區錶盤被六點鐘位置嘅秒針盤分隔，而每當第二時區指針到達右方嘅「24」，就會回撥到左方嘅「24」繼續報時 (亦即Retrograde 功能)。

而42mm鈦金屬外殼嘅左右兩則，分別有兩個錶冠，右邊 (3點位置) 嘅錶冠就係正常拉出轉動調較鍍金鏤空嘅主時針、分針及藍色第二時區時針；而按下右邊的錶冠，主時針就會不影響分針及第二時區時針的情況下，自動向前跳一小時，方便用家到達另一個時區時快速設置當地時間。

而鏤空錶面下能夠見到CYR 708自動上鍊機芯，共278個零件、最少55小時動力儲存。錶殼就可以選擇鈦金屬、鈦金屬加黑色DLC邊，及成個都係黑色DLC鈦金屬，簡單啲講就係「銀色」、「有啲黑色」同「成隻黑色」嘅分別。每個錶殼款限量生產50枚。