講酒之前先講下八卦——卻說Brad Pitt與Angelina Jolie打得火熱之時，就買咗位於法國普羅旺斯地區嘅Miraval酒莊，2012年聯名出過一支「Chateau MIRAVAL」玫瑰紅酒，2014嘅婚禮更加係於呢個酒莊到舉行。而後來兩人於2016年分居、2019年正式離婚，呢個訂情酒莊更加成為兩人爭奪嘅財產之一。最後邊個爭贏我就唔知，我淨係知Chateau MIRAVAL就以Brad Pitt個名，出咗支玫瑰香檳「Fleur de Miraval」，而且香港有得買啫。

「Fleur de Miraval」嘅靈感係來自同名嘅伯爵夫人，據說因為夫人出生於盛產玫瑰香檳嘅普羅旺斯地區，所以成世人都淨係飲玫瑰香檳，而且特別鍾情霞多麗葡萄 (Chardonnay) 嘅烤榛子香及用「放血法 (Saignée) 釀製嘅 黑皮諾葡萄 (Pinot Noir) 果味。而呢支「Fleur de Miraval」亦同樣用上75%霞多麗葡萄加25%黑皮諾葡萄混釀，再放於Le Mesnil-sur-Oger嘅漆黑酒窖中陳年三年。

「Fleur de Miraval」全球限量生產20,000支，而香港亦有酒商引入，將會於聖誕前開售。粉紅色盒、粉紅色酒標、純黑酒瓶設計再加Brad Pitt個名，應該都會幾得女仔歡心。