早幾年日本威士忌大熱，多個酒款都賣到斷哂市——唔係補唔切貨嗰種，而係酒廠都冇貨嗰種。其中日本Suntory推出、幾乎每個日本威士忌愛好者都要有支嘅「白州12年」亦於2018年6月宣佈停產。事隔兩年有多，Suntory就宣佈「白州12年」返黎啦！

圖片：截圖自Suntory

據Suntory官網公佈，白州12年將於今年3月30日起重新開售，雖然Suntory就話預計足夠「中長期供應」，但大家需知道「12年」嘅威士忌真係12年前整落，而12年前就應該冇人預計到會有咁搶手，所以Suntory都講到明係數量限定，大家有買就襯早啦！