獨立腕錶品牌Maximilian Busser & Friends（MB&F）一向以破格創新設計聞名，當中HM（Horological Machine）及LM（Legacy Machine）系列最為人熟識。隨住LM系列邁進十週年，MB&F特別推出全新腕錶「LMX」。

MB&F於2011年推出LM系列第一款作品「Legacy Machine N°1」，開創出HM以外全新系列，從此MB&F就擁有兩種對時間嘅表述形式。十年後，MB&F選擇回到初衷，貫徹首款LM腕錶功能，以羅馬數字「X」象徵十週年，推出「LMX」腕錶。

LMX與歷年LM系列作品相似，以兩個傾斜白色雙錶盤分別代表雙時區，著由兩個不同錶冠調校。位於2點鐘方向錶冠可以調整右側錶盤及上鏈，而10點鐘方向錶冠上則刻有地球圖案，代表設定左側第二時區錶盤時間。

錶面上6點鐘方向為秒針輪，正中央係一個直徑13.4mm嘅飛行游絲擺輪，跳脫傳統螺絲擺輪配置，改以配重砝碼擺輪結構，令製錶師能夠精準調節LMX機芯。比起過往幾代LM作品，LMX有更多齒輪、紅寶石軸承裸露喺錶盤上，令錶面睇落更為豐富。