1991年於日本播出嘅賽車動畫《高智能方程式》（新世紀GPXサイバーフォーミュラ），相信係唔少80-90後嘅童年回憶，當中嘅金句「今天的我...沒有極限！」更係家傳戶曉。為慶祝動畫播出30周年，官方近日同SEIKO合作推出「30周年紀念腕錶」。

今款作品採用石英機芯，設計靈感嚟自主角風見隼人所駕駛嘅「ASURADA GSX」，設計師巧妙咁將ASURADA儀表板融入錶盤上嘅計時碼錶，並喺12點鐘方向放上主角車隊「SUGO ASURADA」嘅金屬LOGO，等用家每次睇錶都可以憶起動畫入面嘅經典場面。另外，腕錶背面嘅金屬錶蓋亦刻有30周年紀念標誌，以及限量序號（從001/300至300/300）。

售價為44,000日元（約$3,100港幣），限量300隻，預計2022年1月發售，現已接受預訂。

資料來源：animate-onlineshop